Fanie Barnard is een van die steunpilare in Stof se lewe. Deur sy opregte en pretensielose menswees, druk hy 'n stempel van integriteit af, waar hy ookal gaan. Duidelik blyk dit toe verder, hy ken ook mense van karakter. As Fanie iemand aanbeveel, kan jy weet, jy sal sonder twyfel deur daardie persoon se blote teenwoordigheid en menswees verryk word.

So gebeur dit mos dat Stof se knaagdiertjies 'n behoefte aan saagsels ontwikkel. Die gewone bronne waar Stof gewoonlik saagsels kry, is buite aksie. So wend Stof hom tot Fanie met sy nood. Fanie laat dit nie daar nie en binne enkele dae laat weet hy, gaan maak 'n draai by Murray.

Murray Naude en Manie, die breine agter MLN Woodturning, blyk toe in dieselfde interiteitsvlak te wees as Fanie. Beide is uitgaande persone wat elkeen wat hul perseel betree, met 'n aansteeklike entoesiasme begroet. Hulle maskerlose aanvaarding van elke unieke individu, maak dat hulle dadelik vertroue inboesem.

Stof word deur hulle geseën met vier groot sakke vol saagsels. Dit behoort sommer weer 'n lang tyd te hou. Die aand nadat hy die knaagdiertjies se kwartiere toegerus het met die nuwe en sagte saagsels, kon jy sommer die opflikkering sien in die diertjies se gemoedvlakke.

Stof deel dus met graagte meer oor Murray en Manie. Murray en Manie bedryf 'n houtwerkwinkel, wat spesialiseer in presisie draaiwerk. Die enkele produkte wat Stof gesien het, getuig van 'n toewyding aan kwaliteit. Hulle werkwinkel is sinvol uitgelê en dit maak dat die produkte dus van besondere kwaliteit is.

Buiten hulle uitsonderlike menseverhoudings en eerlike respek vir elke gelykgeskapene, is die toewyding aan vakmanskap en die netheid van hul werkwinkel, alles faktore wat beïndruk.