Op Donderdag 13 November het die groep DOR hul nuwe album, Dis jy, bekendgestel by 'n smaakvolle funksie by die Batter Boys. Onseker oor presies wat om te verwag het die gaste bly gis oor wat hulle te wagte kan wees. Asof hulle dit kon aanvoel, het die drie sterre van DOR begin met die snit snit "Kyk hoe lyk ons nou!". Hulle het verseker goed gelyk. Met 'n verskeidenheid eie komposisies, ander topskrywers se lirieke en bekende hartbreektreffers het hulle duidelik gewys dat hulle hul talent ten volle benut. Al sou die versoeking groot wees om al die applous vir hulself te neem, het hulle dit duidelik gestel dat hul teenoor God 'n groot dankbaarheid het oor hul talent. Hul bestuurder, Peter Simpson, is ook deeglik erken in die dankbetuigings.

Van die treffers wat op die nuwe laserplaat voorkom, is bekende snitte soos Kaapse draai deur Steve Hofmeyer, Liedjie vir jou van Jannie du Toit en 'n unieke Christa Steyn keurspel. Van hulle eie komposisies op die produksie is onder andere Gebed, Dankie vir jou en Dis Jy.

Die tegniese versorging is uitsonderlik. Dit is duidelik dat daar meestervingers op die mengbank was. Ceazar de Almeida, die onbetwiste meester van klankingenieurs was verantwoordelik vir die passievolle tegniese versorging van hierdie produksie.

DOR bestaan uit Damian, Oane en Richard. Hierdie drie manne se talent gee aan loslit Afrikaans nuwe definisie. Hulle beindruk dadelik met hul entoesiastiese vertolking van eie asook ander se beste komposisies. Die vertolkings is opgewek, dog uitstekend gedefinieerd. Die samesmelting, maar ook die diversiteit van hul stemme het die gehoor op die punte van hul stoele gehad. Dit is duidelik dat hulle spontaan saamwerk en 'n gedugte span vorm. Afrikaans kan jou voete laat juk - danksy DOR.