Visvang, hengel, lyn natmaak en verskeie ander terme is al gebruik om te omskryf wat gebeur as ‘n man sy visstok oplaai en viswater toe verdwyn. Dit impliseer natuurlik nie dat daar noodwendig vis gevang gaan word nie, maar viswaters is tradisioneel vir ‘n groot deel van die gemeenskap ‘n tipe terapie. Deur ‘n visstok vas te hou, of dan minstens net in die omgewing te wees van ander wat jou passie deel, bring meer ontspanning en stresverlies as wat menige psigiater ooit sou kon regkry met geykte metodes.

Buddy Vaughn het hierdie konsep op meesterlike wyse vasgelê. Deur oorspronklike musiek wat ons plaaslike visvang-scenario netjies vasvat, vul hy die gaping in die mark wat min ander kunstenaars nog suksesvol kon betree. Omdat Buddy self ‘n visserman in hart en siel is, verstaan hy waaroor die ontspannings-konsep van die viswaters gaan. Sy musiek weerspieël elke aspek van hierdie, dikwels geslote, kultuur wat deur baie misverstaan en geminag word. Buddy bring jou ‘n nuwe insig, ‘n tipe begrip vir die diepste wese van ‘n visserman.

Deur etlike dekades se ondervinding in die vermaaklikheidsbedryf het Buddy ‘n fyn aanvoeling vir sy gehoor ontwikkel en slaag hy met elke optrede daarin om sy program aan te pas by die reaksie van sy gehoor. Dit skep ‘n unieke kameraadskap, wat maak dat Buddy na ‘n optrede vir sy gehoor soos ‘n jare lange familielid voel. Sy sukses word weerspieël deur die verkope van sy vier laserplate wat almal besonder suksesvol is.

Buddy is al gekritiseer dat hy oppervlakkig is, dat sy humor platvloers is en dat hy sy gehoor sou aanstoot gee. Die oomblik as daar egter dieper gekyk word na sy musiek, is dit duidelik dat hy juis ‘n besondere begrip het vir die stres waardeur die meeste mense vandag getreiter word. Deur die onspanningsaspek van visvang op ‘n spontane wyse aan te bied, slaag Buddy daarin om mense weer van hulle maskers te leer ontsnap en so op ‘n natuurlike manier ‘n komende hartaanval te voorkom.