Daar was 'n paar mense wat hulle nooit in die steek gelaat het nie. Mense wat ten spyte van ondankbare bevooroordeeldes, gehoorsaam gebly het aan Vader se opdrag om jou naaste soos jouself lief te hê. Stof sê vandag dankie aan daardie mense en eer hulle vir hul gehoorsaamheid.

Al was die laaste woonplek in die opelug en al het elemente hul tol daar geëis, is afskeid van 'n vorige woonplek tog maar nostalsgies. Die lewenslesse wat Vader hierdie twee mense mee verryk het in hulle tyd van swaarkry, het hulle egter toegerus om van hier af, hierdie wysheid te gebruik om ander te kan dien, wat steeds in nood is.

Die proses het enkele jare gelede begin toe Cazandra deel was van 'n span wat op verskeie bedieningspunte evangeliese uitreike gehou het. Vader het toe reeds voorsien dat sy in hierdie proses met die regte amptenare verhoudinge opgebou het.

Hierdie verhouding tussen haar en die owerhede het daartoe gelei dat heelwat ander inwoners van die een projek waarby sy betrokke was, ook vandag en oor die volgende twee dae, huise ontvang.

Hiermee ook 'n besondere woord van dank aan die amptenare Annetjie, John, Linda en Joshua, wat altyd bereid was om die tweede en selfs derde myl te stap saam met die begunstigdes tydens die aansoek- en administratiewe prosesse te midde van baie teenstand van enkele van hul kollegas.

Die oomblik van vertrek het aangebreek en die opelug gastehuis is met gemengde gevoelens agtergelaat. Dit is met hartseer dat ons kon terugkyk na die wat agterbly en vannag steeds onder die blote hemel slaap. My wens is dat Vader hierdie mense ook spoedig sal seën met goeie verblyf.

Onderweg na die nuwe adres, was daar min woorde, maar 'n voelbare afwagting. 'n Dankbaarheid wat die voertuig se kajuit gevul het met 'n gevoel van afwagting op 'n nuwe lewe in 'n huis, waar die ontberinge van verskeie jare, net as herhinderinge sal leef.

Met ons aankoms by die nuwe adres, het die vroegoggendson die skoon nuwe strate en rye leë huise prentjiemooi laat lyk. Dit was asof die omgewing hom ook voorberei het op die goeie dinge wat Vader vandag hier gaan laat gebeur.

Shikrastraat, 'n splinternuwe straat wat nog nie eers op kaarte voorkom nie, het ons verwelkom. Al die amptenare, buiten 'n politieke amptenaar wat baie belangrik probeer wees het en die atmosfeer probeer bederf het met sy oordrewe selfbeeld, was vriendelik en hulpvaardig.

Hulle geduld en bereidheid om die toewysings te laat vlot was opvallend. Tydens die versoek om hul publiek te bedank, het die amptenaar met die persoonlikheidprobleem gesê ons kan slegs na sy titel en sy naam en "my staff" verwys, maar nie hulle name nie, omdat hy die groot kokkedoor is....

Dit, direk nadat hy homself met groot gebaar en op 'n politieke titel voorgestel het. Hy sê mos hy ag dit nie nodig dat die toegewyde personeel, synde sy "minderes", by name genoem word nie. Hierdie amptenaar het egter niks gedoen om sake te laat vlot nie, maar deur sy egoreis van minagting vir sy kollegas en die begunstigdes, sake net versuur.