'n Sleepwa of woonwa is 'n baie nuttige voertuig wat jou lewe baie makliker kan maak. As jy dus so geseën is om die eienaar te wees van 'n gesleepte voertuig, is deel van jou verantwoordelikheid om die veiligheidstoerusting daarop instand te hou sodat die gebruik daarvan, nie vir jouself of enige ander padgebruikers, enige risiko's inhou nie.

Een van die belangrike veiligheidsfaktore wat bepaal hoe veilig jou gesleepte voertuig op die pad is, is die korrekte werking van die diensligte. Dit moet te alle tye in die korrekte kombinasies kan werk, en ook helder genoeg wees dat dit goed sigbaar is vir die padgebruiker wat agter jou voertuig ry.

Die minimum goedgekeurde standaard van die kabel wat gebruik moet word, bestaan uit sewe are. Ses van die are, naamlik die geel, blou, groen, bruin, rooi en swart, se deursnit-oppervlak moet elk 0.75mm² wees. Die wit geleier, wat as aarding en terugvoer dien, se deursnit-oppervlak moet 1.5mm² wees.
Vir voertuie wat besonder lank is, is daar ook 'n kabel beskikbaar waarvan die deursnit-oppervlak van die geel, blou, groen, bruin, rooi en swart geleiers, 1.5mm² is. Die wit geleier se deursnit oppervlak is 2.5mm².
Die wit geleier is gewoonlik in die middel van die saamgestelde kabel, met die ander ses daarrondom gerangskik.

Die 12V (12N7) sok en prop, en die 24V (24N7) sok en prop se buise en penne is verskillend gerangskik. Dit voorkom dat die stelsels wat van bedryfspanning verskil, nie aan mekaar kan koppel nie ter voorkoming van skade aan beide die sleepvoertuig sowel as die gesleepte voertuig se bedrading en toerusting. Beide standaarde gebruik egter een van die die gespesifiseerde kabels soos hierbo beskryf.