INK GEDAGTES
deur Deon van Wyk
 
Aan die einde van 
my pen se punt, 
sal jy die begin 
van my gedagtes vind, 
op die wit papier 
waar woorde sink, 
in  n pulp woestyn 
wat dors na ink. 
 
Van voor tot agter 
in lyne geplant, 
is jy geplot 
in  n hart se brand, 
blink is die naald 
in die lig van die kers, 
wat hekel en brei 
aan 'n droom kombers. 
 
My beker loop oor 
van dit wat brou, 
telkens as die woorde 
jou skouers omvou, 
sonder dat jy weet 
is jy ewig hier, 
in die ink geskribbel 
op my wit papier. 
 
Stil wonder ek dan  
hoe dit sou lees, 
as my woorde ook deel  
van jou kon wees, 
is dit die antwoord 
wat ek nooit sal weet, 
of jy wil onthou of 
sommer net vergeet?


Nota:  Is iemand wat daarvan hou
 om te soek en te beproef, so ruk
 en pluk, trek en rek, skei die
 koring van die kaf en los my met
 die goeie!