Die Wag
Deur Gert Strydom
 
Saggies soek  n wag en skyn sy lig in die nag, 
wat deur die donkerte trag om met flikkerende heerskappy 
by geboue van beton en glas verby 
te bars en te gly en dan te plas 
op die ysterstaalmas met hoë torings 
en metaal raamwerk waar die wêreld in die wolke handel dryf 
en hy gaan doodstil staan om gespanne te luister 
of iets in die duister beweeg. 
  
Hy trek sy streep met die duistere donker nag 
en veraf is stemme wat vrolik lag 
en masjiene wat swoegend dreun; 
maar hier waar hy teen die reling leun is dit altyd veilig 
asof die nag heilig  n geheime storie 
sag fluister aan die wag wat ewiglik luister 
tot die dagbreek se strale oor die horison steek.